Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 60.27 | Dem. 60.30 (English) | >>Dem. 60.33 |
60.29ἠκηκόεσαν Λεωντίδαι μυθολογουμένας τὰς Λεὼ κόρας , ὡς ἑαυτὰς ἔδοσαν σφάγιον τοῖς πολίταις ὑπὲρ τῆς χώρας . ὅτε δὴ γυναῖκες ἐκεῖναι τοιαύτην ἔσχον ἀνδρείαν , οὐ θεμιτὸν αὑτοῖς ὑπελάμβανον χείροσιν ἀνδράσιν οὖσιν ἐκείνων φανῆναι . ἐμέμνηντʼ Ἀκαμαντίδαι τῶν ἐπῶν ἐν οἷς Ὅμηρος ἕνεκα τῆς μητρός φησιν Αἴθρας Ἀκάμαντʼ εἰς Τροίαν στεῖλαι . ὁ μὲν οὖν παντὸς ἐπειρᾶτο κινδύνου τοῦ σῷσαι τὴν ἑαυτοῦ μητέρʼ ἕνεκα · οἱ δὲ τοὺς οἴκοι σύμπαντας γονέας πῶς οὐκ ἤμελλον ὑπὲρ τοῦ σῷσαι πάντα κίνδυνον ὑπομένειν ;
60.30οὐκ ἐλάνθανεν Οἰνείδας ὅτι Κάδμου μὲν Σεμέλη , τῆς δʼ ὃν οὐ πρέπον ἐστὶν ὀνομάζειν ἐπὶ τοῦδε τοῦ τάφου , τοῦ δʼ Οἰνεὺς γέγονεν , ὃς ἀρχηγὸς αὐτῶν ἐκαλεῖτο . κοινοῦ δʼ ὄντος ἀμφοτέραις ταῖς πόλεσιν τοῦ παρόντος κινδύνου , ὑπὲρ ἀμφοτέρων ἅπασαν ᾤοντο δεῖν ἀγωνίαν ἐκτεῖναι . ᾔδεσαν Κεκροπίδαι τὸν ἑαυτῶν ἀρχηγὸν τὰ μὲν ὡς ἔστιν δράκων , τὰ δʼ ὡς ἔστιν ἄνθρωπος λεγόμενον , οὐκ ἄλλοθέν ποθεν ἢ τῷ τὴν σύνεσιν αὐτοῦ προσομοιοῦν ἀνθρώπῳ , τὴν ἀλκὴν δὲ δράκοντι . ἄξια δὴ τούτων πράττειν ὑπελάμβανον αὑτοῖς προσήκειν .
60.31ἐμέμνηνθʼ Ἱπποθωντίδαι τῶν Ἀλόπης γάμων , ἐξ ὧν Ἱπποθῶν ἔφυ , καὶ τὸν ἀρχηγὸν ᾔδεσαν · ὧν , τὸ πρέπον φυλάττων ἐγὼ τῷδε τῷ καιρῷ , τὸ σαφὲς εἰπεῖν ὑπερβαίνω . ἄξια δὴ τούτων ᾤοντο δεῖν ποιοῦντες ὀφθῆναι . οὐκ ἐλάνθανεν Αἰαντίδας ὅτι τῶν ἀριστείων στερηθεὶς Αἴας ἀβίωτον ἑαυτῷ ἡγήσατο τὸν βίον . ἡνίκʼ οὖν ὁ δαίμων ἄλλῳ τἀριστεῖʼ ἐδίδου , τότε τοὺς ἐχθροὺς ἀμυνόμενοι τεθνάναι δεῖν ᾤοντο , ὥστε μηδὲν ἀνάξιον αὑτῶν παθεῖν . οὐκ ἠμνημόνουν Ἀντιοχίδαι Ἡρακλέους ὄντʼ Ἀντίοχον . δεῖν οὖν ἡγήσαντʼ ἢ ζῆν ἀξίως τῶν ὑπαρχόντων ἢ τεθνάναι καλῶς .
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 60.27 | Dem. 60.30 (English) | >>Dem. 60.33 |